اُردُولُغت

اردو ذخیرہ الفاظ

آن لائن اردو لغت مفصل تلاش کے ساتھ

https://www.urdulughat.pk/Post/alag-duniya-ki-karo-sy-mughal-ki-car

الگ دنیا کی کاروں سے مغل کی کار ہے پیارے

الگ دنیا کی کاروں سے مغل کی کار ہے پیارے

 

الگ دنیا کی کاروں سے مغل کی کار ہے پیارے

سنا ہے پچھلے دس سالوں سے یہ بیمار ہے پیارے 

زمانے کے لئے عبرت کا اک شہکار ہے پیارے 

مغل کے واسطے اک مستقل آزار ہے پیارے 

کسی بھی کار سے زنہار چال اس کی نہیں ملتی 

یہ وہ شے ہے کہ دنیا میں مثال اس کی نہیں ملتی 

کئی فرلانگ تک دھکا لگاتے ہیں تو چلتی ہے 

پسینہ چار چھ ساتھی بہاتے ہیں تو چلتی ہے 

سحر سے شام تک ہینڈل گھماتے ہیں تو چلتی ہے 

سر اس کے سامنے اپنا جھکاتے ہیں تو چلتی ہے 

ترس کھا کر مغل پر جب بھی یہ آتی ہے حرکت میں 

یقیں کرنا ہی پڑتا ہے بڑی طاقت ہے قدرت میں 

یہ چلتی ہے تو شوفر کو بھلا کب ہوش رہتا ہے 

ہر اک رہ گیر تا حد نظر روپوش رہتا ہے 

جہاں بھی اس کا جو پرزہ ہے وہ پرجوش رہتا ہے 

مگر اک ہارن ہے کم بخت جو خاموش رہتا ہے 

کوئی اب اس کی فطرت کا لگائے خاک اندازہ 

گیئر اس کا بدلتے ہیں تو کھل جاتا ہے دروازہ 

کریں ریورس تو افسوس یہ آگے کو چلتی ہے 

دباتے ہیں کلچ اس کا تو بتی اس کی جلتی ہے 

اگر ملتان جانا ہو تو بھکر جا نکلتی ہے 

جو پہیوں کے تلے اینٹیں رکھیں یہ تب سنبھلتی ہے 

مغل گاڑی کے ہر اک وصف کا ادراک رکھتے ہیں 

جبھی تو کار میں اینٹوں کا وہ اسٹاک رکھتے ہیں 

ہیں اس میں جس قدر سیٹیں وہ اسپرنگوں سے خالی ہیں 

گماں ہوتا ہے آثار قدیمہ سے نکالی ہیں 

ہجوم دوستاں نے دھجیاں اس کی اڑا لی ہیں 

وہ ہر اک بیٹھنے والے سے کپڑے کی سوالی ہیں 

پریشاں اس کا شیرازہ ہر اک کل اس کی بے کل ہے 

یہ وہ گاڑی ہے جو فن کار کی تخلیق اول ہے 

اسے رستے میں بس تقدیر ہی روکے تو رکتی ہے 

مغل کی آہ پر تاثیر ہی روکے تو رکتی ہے 

ہمارا نالۂ دلگیر ہی روکے تو رکتی ہے 

وگرنہ پھر کوئی خنزیر ہی روکے تو رکتی ہے 

مرے یارو جہاں یہ جانور کم پایہ جاتا 

خدا جانے وہاں کیسے اسے ٹھہرایا جاتا 

ملتے جلتے آرٹیکلز