اُردُولُغت

اردو ذخیرہ الفاظ

آن لائن اردو لغت مفصل تلاش کے ساتھ

https://www.urdulughat.pk/Post/mery-pyary-allah-mian

میرے پیارے اللہ میاں

میرے پیارے اللہ میاں

 

میرے پیارے اللہ میاں
دل میرا حیران ہے
میرے گھر میں فاقہ ہے
اس کے گھر میں نان ہے
میں بھی پاکستان ہوں
اور وہ بھی پاکستان ہے
میرے پیارے اللہ میاں
لیڈر کتنے نیک ہیں
ہم کو دیں وہ صبر کا پھل
خود وہ کھاتے کیک ہیں
میرے پیارے اللہ میاں
سوچ کے دل گھبراتا ہے
بند ڈبوں میں خالص کھانا
ان کا کتا کھاتا ہے
میرا بچہ روتے روتے
بھوکا ہی سوجاتا ہے

میرے پیارے اللہ میاں

یہ کیسا نظام ہے

فلموں میں آزادی ہے

ٹی وی پر اسلام ہے
میرے پیارے اللہ میاں
دو طبقوں میں بٹتی جائے
ایسی اپنی سیرت ہے
ان کی چھت پر ڈش انٹینا
میرے گھر میں بصیرت ہے
میرے پیارے اللہ میاں
تیرے راز بھی گہرے ہیں
ان کے روزے سہری والے
میرے آٹھ پہرے ہیں
میرے پیارے اللہ میاں
روزہ کھولوانے کی ان کو
دعوت ملے سرکاری ہے
میرا بچہ روزہ رکھ کر
ڈھونڈتا پھرے افطاری ہے
میرے پیارے اللہ میاں
یہ کیسا وٹہ سٹہ ہے
این ٹی ایم کا سر ہے ننگا
پی ٹی وی پہ ڈوپٹہ ہے
میرے پیارے اللہ میاں
بادل مینہ برسائے گا
اس کا گھر دھل جائے گا
میرا گھر بہہ جائے گا
میرے پیارے اللہ میاں
چاند کی ویڈیو فلمیں دیکھ کر
اس کا بچہ سوتا ہے
میرا بچہ روٹی سمجھ کر
چاند کو دیکھ کے روتا ہے 

میرے پیارے اللہ میاں
میری آنکھ کیوں چھوٹی ہے
اس کی آنکھ میں کوٹھی ہے
میری آنکھ میں روٹی ہے
میرے پیارے اللہ میاں
یہ کیسی ترقی ہے
ان کی قبریں تک ہیں پکی
میری بستی کچی ہے

ملتے جلتے آرٹیکلز